‘n Paar jaar gelede was my lewe, om die minste te sê, uiters vaal, onbenullig, ongelukkig en rigtingloos. Ek het almal en alles geblameer vir my ongelukkigheid en nie gesien dat die antwoord reg onder my neus lê nie.

Ek het op ‘n artikel afgekom omtrent “Living with Passion”, en hierdie woorde, “Living with Passion is about creating and experiencing joy in as many aspects of life as possible” het my na my eie lewe met nuwe oë laat kyk. Wat op aarde het my laat dink dat enige iemand anders behalwe ek self verantwoordelik kan wees vir my geluk?

‘n Passievolle lewe is meer as net ‘n filosofie—meer as onbenullige wense vir geluk in jou gedagtes. Dis nie ‘n probleem-vry-, feëverhaal-bestaan nie en dit belowe ook nie rykdom en faam nie.

Eerder, dis ‘n bestaan wat bewustelik gekies is, bewustelik ontwerp is en ‘n bestaan wat verantwoordelik gelewe word. Dit is ‘n besluit omtrent wat jy wil vermag. Dit is om sonder huiwering deur elke storm van die lewe te beweeg en om wyser en sterker anderkant uit te kom. Dit is om aanhoudend te leer, lief te hê en te groei.

‘n Passievolle lewe is ‘n vervulde lewe. Dit laat jou toe om te sê, “Hierdie is belangrik. Dit is wat die Heelal my gegee het om na die wêreld te bring en ek gaan dit volstoom doen!”

‘n Passievolle lewe bedoel jy neem verantwoordelikheid vir jou keuses, jou aksies en jou ondervindings. Dit bedoel jy beweeg vorentoe van hierdie dag sonder self-opgelegde limitasies, klagtes of spyt.

Om passievol te lewe is om entoesiasties te lewe. Kombineer aksie en passie en jy sal entoesiasme beleef. En dit is maklik om entoesiasme met andere te deel want entoesiasme is aansteeklik.

Vind jou passie vandag en deel vandag jou entoesiasme vir die lewe met iemand—’n vriend, ‘n medewerker, familielid of selfs iemand wat jy nog nooit tevore ontmoet het nie.

‘n Passievolle lewe is ‘n inspirerende geskenk wat die wêreld vir baie generasies kan verhelder!

Groete vir nou!

Foto geneem in Ballito, KwaZulu Natal, Suid Afrika
- Kamera FujiFinepix 2800Zoom Digitaal

Is dit nie snaaks dat die einde van die jaar en die begin van elke nuwe jaar iets in mens wakker maak nie? ‘n Gevoel van om ou goed afgehandel te kry, ordentlik oor te begin, dinge te verbeter, iets nuuts te probeer of sommer net al die kaste af en uit te stof en reg te pak.

En tog is vandag, hierdie eerste dag van 2011, maar net nóg ‘n Saterdag, en sal Maandag ook maar net nóg ‘n dag van ‘n nuwe week wees… daar is nie ‘n skielike stilstand van tyd op Oujaarsaand in die Heelal nie, en ook nie ‘n oomblik van stilte in die natuur sodat die volgende twaalf maande bepeins kan word nie; maar tog is die ganse mensdom se gedagtes op hiérdie aand nooit dieselfde as op enige ander aand wanneer dit donker word nie.

Maar vir my is Oujaarsaand spesiaal, soos ‘n volmaan-aand, vol verwondering oor die voltooiing van ‘n siklus. Dis al jare lank ‘n tradisie vir my om op die kop middernag (terwyl manlief salig lê en slaap!) die tuin in te storm en al die diere, plante en bome ‘n gelukkige nuwe jaar toe te wens met ‘n luide gejuig, tot die konsternasie van party voëls, wat met ‘n luide vlerk-geklap die nag invlieg na ‘n veiliger en stiller oord!

En Nuwejaarsdag moet reg begin word – mooi klere aantrek, tyd deurbring saam met geliefdes en mooi gedagtes dink – want ek glo dat, wat jy elke dag doen, is hoe jy die res van jou lewe deurbring.

Ek wens jou ‘n Voorspoedige Nuwe Jaar en mag jou 2011 vol vreugde en inspirasie wees!

En een laaste gedagte vir die begin van hierdie nuwe jaar : MOENIE DRINK EN VLIEG NIE!

Ek is ewe skielik siek en sat. Siek vir ingewikkeldheid en sat vir ongemak.

Nou het ek tot ‘n besluit gekom in my lewe! Verby is die dae van “it’s painful to be beautiful!” Skoene wat knyp (dra hulle omdat hulle hoogs modieus is), broeke wat te styf is wanneer jy sit (om jou kurwes te adverteer), armbande en ringe en nekstukke wat in die pad is wanneer jy naby jou kunswerk klein detail wil insit – van nou af is dit kaal arms en nek, plat sandale en tekkies en broeke wat lekker gemaklik sit! Darem nou nie daai denims met die rek in die agterkant of sommer sloffies nie, maar goed wat mooi is en gemaklik sit en my toelaat om te beweeg sonder dat ek voel ek gaan omkantel of uitpass van drukking nie.

‘Gecko’ lig teen die eetkamer muur

En dieselfde is van nou af van toepassing in my huis. Die ‘fensy’ ingevoerde ligte wat so pragtig is, maar waar dit ‘n groot gesukkel is om die gloeilamp te vervang (en buitendien is die lig wat hulle verskaf tog al te flou), is uit by die deur, vervang met iets prakties, wat helder lig kan gee, waarby ek gemaklik ‘n boek kan lees en waar ek self sonder ‘n gesukkel ‘n nuwe gloeilamp kan insit. ‘Down-lighters’, met miljoene gloeilampies waar alewig net twee brand, ondervloerverhitting waarmee iets alewig skort, en dan word al die vloere op gekap om die fout te soek, is uit my lewe – ons sal maar bibber van die koue en meer warm klere aantrek.

Nuwe tuisgemaakte krane in die badkamer

Dan is daar ingevoerde toilette en krane – om ‘n simpel rubber seël te vervang lei tot vervanging van die hele toestel, want parte is nie meer beskikbaar nie, so van nou af is dit ‘koop Suid-Afrikaans’ vir my! Ek gaan nou ook ‘n geutlose huis hê, want dié is alewig verstop van al die blare en dan het ons buitendien ‘n wateval voor die voordeur. En hout-dekke wat twee maal ‘n jaar vernis en weer vasgeskroef moet word gaan nou vervang word met teëls – eenvoudige, plaaslike, maklik-om-skoon-te-maak-en-te-vervang teëls.

My Half-mens (Pachypodium lealii) dood geryp verlede winter

In die tuin gaan dit dieselfde – iets wat nie ‘n winter oorleef nie word nooit weer geplant nie en water-liefhebbers, volgens my mening, hoort binne in die dam, nie buite nie! Uitheemse bome en pragtige palms maak nou plek vir inheemse goed wat kos en skuiling vir die voëltjies kan verskaf, wat aangepas is vir ons Hoëveldse klimaat, en wat lekker skaduwee gee om onder te sit.

Viva la eenvoud, gemaklikheid en Suid-Afrikaans!

Het jy al ooit iets begin, iets wat die moeite werd kon gewees het, en toe sommer tou opgegooi omdat dit te veel werk was, of te moeilik was, net nie vinnig genoeg gevorder het nie, of te veel tyd opgeneem het?

Daar is geen plaasvervanger vir uithouvermoë nie! Dit kannie vervang word deur enige ander eienskap nie. Onthou dit aan die begin en dit sal jou bystaan wanneer dinge moeilik lyk.

Diegene wat uithouvermoë aangekweek het as ‘n gewoonte blyk versekering te hê teen toekomstige mislukkings.

Maak nie saak hoeveel maal hulle verslaan word nie, hulle arriveer altyd bo aan die leer. Partymaal lyk dit of daar ‘n versteekte gids is wie se plig dit is om mense deur allerhande ontmoedigende ondervindings te toets. Diegene wat hulself optel en weer probeer, bereik hul bestemming; en die wêreld skree “Bravo! Ons het geweet jy kan dit doen!”

Die versteekte gids laat geeneen toe om groot prestasie te geniet sonder om die uithouvermoë toets te trotseer nie. Diegene wat dit nie kan doen nie, haal net nie die paal nie…

Diegene wat dit wel kan doen, word mildelik beloon vir hul uithouvermoë. Hulle ontvang, as hul kompensasie, die doel wat hulle nastreef.

Oorvloed op ons Aarde

“Die Rivier” – waterverf op Bockingford 300gsm – Maree

.

Wees bewus van jou gedagtes; dit lei na houdings.

Wees bewus van jou houdings; dit lei na woorde.

Wees bewus van jou woorde; dit lei na aksies.

Wees bewus van jou aksies; dit lei na gewoontes.

Wees bewus van jou gewoontes; dit vorm jou karakter.

Wees bewus van jou karakter; dit bepaal jou noodlot.

.

# Wees onberispelik met jou woord.
# Moenie dinge persoonlik opneem nie.
# Moenie veronderstellings maak nie.
# Doen altyd jou beste.

Uiteensetting :

1. Wees onberispelik met jou woord

Om onberispelik met jou woord te wees, is om te sê wat jy meen en te meen wat jy sê. Die manier waarby mense jou waarneem is deur jou gesproke woord asook jou aksies. As jy ‘n belofte maak, kom dit so ver moontlik na. As iemand jou vir iets vra of jou vra om iets te doen, dink versigtig daaroor na, want om ja te sê wanneer jy nie seker is nie of dit nie bedoel nie, is seer sekerlik ‘n smet op jou integriteit.

2. Moenie dinge persoonlik opneem nie

Wanneer iemand iets sê of doen wat jou omkrap, moenie onmiddellik aanneem dat dit teen jou gemik is nie – nie alles gaan oor jou nie en min mense gee genoeg om om jou spesifiek die teiken te maak, en dié wat dit wel met kwaadwilligheid doen, is nie die moeite werd om ontsteld oor te raak nie.

3. Moenie veronderstellings maak nie

Wanneer iemand iets sê of doen en jy maak ‘n veronderstelling dat hulle ‘dit of dat’ bedoel het, loop jy die gevaar om vir jou ‘n hele rits ongeluk op die hals te haal. Byvoorbeeld, as iemand iets belowe het en dit dan nie te na kom nie, en jy ‘veronderstel’ dat hulle dit nie gedoen het nie omdat hulle nie vir jou omgee nie, maar intussen lê hulle in die hospitaal met ‘n gebreekte been, dan het jy jouself onnodige pyn veroorsaak deur ‘n veronderstelling te maak sonder om die ware feite te ken.

4. Doen altyd jou beste

Of dit nou iets kleins of groots is, doen altyd jou beste in wat ookal jy aanpak. Nie alleenlik verhoog dit jou self-beeld nie, maar dit spreek ook van integriteit en wys ook aan ander mense dat jy altyd jou beste lewer en derhalwe ook die beste van almal verwag. Hoe mense jou behandel is direk verwant aan hoe jy jouself behandel.

Vir nog meer artikels oor hoe om oorvloed in jou lewe en op aarde te bewerkstellig, gaan na OORVLOED.

Dit is die maand Oktober! Die mooiste, mooiste maand! Dan is die dag so helder, so groen is elke aand… so blou en sonder wolke die hemel heerlik bo, so blomtuin vol van kleure die asvaal ou Karoo, so blomtuin vol van kleure die asvaal ou Karoo. Dit is die maand Oktober! Die akkerboom is groen; die bloekoms langs die paaie is almal nuut geboen; en orals in die tuin rond ruik jy sering en roos, jasmyn en katjiepiering, lemoen en appelkoos…

Die maand van Oktober bring altyd vir my tot gedagte die gedig “Oktober” van C. Louis Leipoldt – elke woord van “die akkerboom is groen” tot met “elke dag so helder, so pragtig elke aand!” is uiters waar en so toepaslik – ek plaas die gedig vir ons almal om te waardeer!

Oktober is ook dus die maand vir ‘spring cleaning’ (alhoewel baie van ons het dit al in September gedoen!) – nie net die motorhuis of stoorkamer nie, maar ook ons innerlike stoorkamer waar ons alles opstoor van onvergifnis, haat en woede tot leed en negatiewe oortuigings. Ons moet leer om te laat gaan en ontslae te raak van al die dinge wat ons terughou van die mildelike OORVLOED in die Heelal.

Laat Gaan
Laat gaan is nie om op te hou omgee nie—dit bedoel net ek kan dit nie doen vir iemand anders nie
Laat gaan is nie om jouself af te sny nie—dit is die realisasie dat ek nie andere kan beheer nie
Laat gaan is nie om nie te doen nie—maar om te leer van natuurlike gevolge
Laat gaan is nie om op te gee nie—dit bedoel die uitkoms is in my hande
Laat gaan is nie om ‘n ander te blameer nie—dit is om die meeste van myself te maak
Laat gaan is nie om reg te maak nie—dit is om te ondersteun
Laat gaan is nie om te veroordeel nie—maar om mense toe te laat om te wees wie hulle wil
Laat gaan is nie om in die middel te wees en die uitkoms te beheer nie—maar om andere toe te laat om in beheer te wees van hulle eie noodlot
Laat gaan is nie om te beskerm nie—dit is om iemand anders toe te laat om realiteit te aanvaar
Laat gaan is nie om te ontken nie—maar om te aanvaar
Laat gaan is nie om te ‘nag’ en te argumenteer nie—dit is om my eie tekortkominge te ondersoek en reg te maak
Laat gaan is nie om te kritiseer en almal te beheer nie—maar om te word waaroor ek droom
Laat gaan is nie om berouvol oor die verlede te wees nie—maar om te groei en te lewe vir die toekoms
Laat gaan is om minder te vrees en meer te lewe!

Jy is waar jy is vandag oor wat jy aanhoudend doen. Meeste mense klassifiseer nie die “klein dingetjies” as slegte gewoontes nie – soos om elke oggend ‘n bietjie laat by die werk op te daag, of om al jou klere te laat rondlê vir iemand anders om te tel, of om altyd to kla en argumenteer oor alles – maar dit sê beslis iets omtrent jouself.

Werk daaraan om hierdie klein ‘gewoontes’ te verander wat jou terughou – maak alles waarmee jy besig is vandag klaar, moenie dit los vir iemand anders om te doen nie.

Maak ‘n lys van dit wat jy weet jy gereeld doen wat jy nie moet nie – en begin hierdie gewoontes te verander in goeie gewoontes.

Niemand kan keer waarheen jy jou gedagtes lei nie. Daar is geen einde aan die vreugdevolle reise wat jy kan ondervind nie. Op die paadjie na jou geluk sal jy alles wat jy wil doen, wees of verlang, ontvang.
(Deur ander hul eie reistog toe te laat, laat jy joune toe!)

C. LOUIS LEIPOLDT – 1880-1947
“OKTOBER”

Dit is die maand Oktober!

Die mooiste, mooiste maand!
Dan is die dag so helder, so groen is elke aand,
so blou en sonder wolke die hemel heerlik bo,
so blomtuin vol van kleure die asvaal ou Karoo,
so blomtuin vol van kleure die asvaal ou Karoo.

Dit is die maand Oktober!
Die varkblom is in bloei;
oor al die seekoeigate is kafferskuil gegroei;
die koppies, kort gelede nog as ‘n klip so kaal,
het nou vir welkomsgroetnis hul mooiste voor gehaal;
het nou vir welkomsgroetnis hul mooiste voor gehaal.

Dit is die maand Oktober!
Die akkerboom is groen;
die bloekoms langs die paaie is almal nuut geboen;
en orals in die tuin rond ruik jy sering en roos,
jasmyn en katjiepiering, lemoen en appelkoos,
jasmyn en katjiepiering, lemoen en appelkoos.

Dit is die maand Oktober!
Ek dink die mense vier vir ewig
in die hemel Oktobermaand soos hier!
Wat wens jy meer as blomme, as helder dag en nag?
Wat kan jy beter, mooier of heerliker verwag?
Wat kan jy beter, mooier of heerliker verwag?
Wat gee ek om die winter?
Wat praat jy nou van Mei?
Wat skeel dit as ons later weer donker dae kry?

Ek is nou in Oktober, die mooiste, mooiste maand,
met elke dag so helder, so pragtig elke aand!
Met elke dag so helder, so pragtig elke aand!

Groete,

.

“Aalwyn” potloodskets en waterverf in my Tuin-joernaal – Maree
(Aloe ferox) Bitter Aalwyn

Die Lente is definitief hier. Die Aalwyne staan nog steeds in vol blom na die koue winter, en elke winter stel hulle my nooit teleur nie met hulle pragtige blomme wat hou tot diep in die lente. Hulle is waarlik ‘n lewens-redder vir al die voëls na die dorre winter, veral die Swart Suikerbekkie (Black Sunbird), wat vroeg-lente al van die heerlike nektar gebruik maak.

Ek het hierdie skets van een van my aalwyne verlede Vrydag in my Tuin-joernaal gedoen nadat ek opgemerk het hoe die bye ook om die blomme saamdrom om te drink. Die plant verskaf die meeste nektar na einde-winter se kant toe.

Vroeg-winter en die aalwyne begin net blom

Middel-winter en almal is in volle blom

Einde-winter en die blomme is vet vol nektar

Lente en die Aalwyne is nou vol saad, ‘n ware bewys dat lente uiteindelik hier is!